Ma, da bi reč rekla!
Mi na selu, navek se mučimo i puno delamo. Stalno v pokretu. Naše je živlenje celodnevna teretana, jogging, šetnja oko pesa i njegve hižice, vežba i znojenje od jutra do večeri. Da bi bili siti, da bi imeli kaj za obleči, decu školati i kroveka nad glavum, treba je na svakom koraku skrbiti. Komadić zemlice i trdi žuli, ak je zdravla, ak je Mir i ljudi su vredni, a državu vode pametni ljudi, vsega je.
Vse kaj nam treba znati o zemli i gospodarstvu navčili sme još ko deca. Gda se pomagalo roditeljima, bil si od duple koristi, jer si se vučil i zamenil si ruke i noge roditelima, kak si znal i mogel. No, v našemu selu sad nas je malo na gruntu ostalo, a puno ih je kaj več delati nemreju, od beteg i prevč let na plećima. Gda se vozimo po cesti, gledim dvorišča. Če su lepa zelena, ak je red kak v pateki, tu gazdarica nema živad na dvorišču. Od kokoši, gusek i racekov trava ne stigne zrasti. Vsaku travku ščupaju z korenjem. Vsako zrno peska pregledaju, travicu, gliste i kojekakve crveke i leteča stvorenja si lepo vjeju, pojeju i v jajca predelaju.
A i dost je mladih kaj su se vrnuli na dedovinu, ali oni ne delaju zemlu več otpiraju kojekakve obrte, knjigovodstva, galerije, narede kak to vole zvati, prenamjenu prostora. Zemlu prodaju za skladišča i tržne centre, a to su zaprav sajmišča pod krovom ze grijanjem i čista kak bolnica. I tam se ljudi idu lečiti od brig. Nekaj kupe pa se zaleče. Pokojni dedeki nesu mogli ni senjati da budu po štaglima visele slike, a v štalici, namesto da muče kravica, a po dojači popevle mleko, beči operna pevačica naslonjena na koncertnega klavera. No, kak je tak je, novi cajti, drukčije živlenje, vse se menja. A i dost je mlajših umirovlenika i onih kaj su ih se firme rešile a još nemaju penziju, pak su se vrnuli na očevinu, nekaj drbaju po vrtu, sade vočke, idu glive brati, spašavleju još to malo zdravlja kaj im je ostalo od asfaltnoga dunsta i sedenja v kojekavim biroima.
Več sem preveč stara da bi se srdila na kojekaj, karaktere i ljude poznam, znam kaj me od koga čeka. Na primera, gospođa Krivušićka, ona kaj se doselila na pokojne Štefice imanje i niko živ v selu ne zna kaj dela, nju sem mam prečitala. Vidim ja skupe, nove aute kak se tu i tam dovezeju na dvorišče, onda ona zapre lesu kaj je visoka i gusta da se niš ne vidi. A okolo je visoka živica od cipresi, kak oko groblja. Ja sem na tavan dela oni teleskop kaj mi je vnuk, sinek mega Jožeka mlajšega, Ivan, donesel, i gda je Jožek na paši z kravicami, ja odem gore preveriti kaj se pri Krivušićki događa. A bome ga i okrenem prema Jožeku i našoj livadi, ona Mara kaj ima hižu pri našoj jogradi mi je nekak sumliva. A muško ko muško, nigda ne znaš kaj mu se po glavi mota. Pri tajnoviti Krivušićki je morti kakva dremajuča teroristička čelija v pitanju, gledim ja te serije na televiziji. Neš v memu selu terorizma delala, makar si gospa z velikega grada i školana i fina i kaj ja znam kaj sve ne. Ja to vse držim na joku.
A da je terorist, bome je, i to kakvi! Dojde sedeti k meni na kavu i nikak doma otiti, nigda kraja nejnoj popevki. A meni gori pod petami. Jožek oče obed na vreme, a ak je gladen, on pobedasti. Sedne na traktora i odveze se par kilometri do čevabdžinice i lepo si tam zeme dve porcije velikih čevapov. Gda se vrne, se oseti ko tvornica luka. Ili ode v pekaru i zeme dva-tri bureka. A moje kuhanje ode ravno vu napoj. Zutra z nova. Ta Krivušićka mi se več tulko put zamerila. I, kaj je najgorše, onda me Jožek još i špota kaj ž njum dajngubim, ni dost kaj se sama grizem.
Kak ti ne razmeš da je došla fektati tvega suhega sireka s banjka!
Daj, Jožek, je to fina gospa, si ona kupi sireka kolko oče. Na placu vsaku subotu zebere sirek, če oče ode i v Švicarsku po onaj ze luknjami.
Si razmisli, kolko put si joj dala suhega sireka z našega banjka?
I bome mi se presvetlilo. I to kak! Vsaki put gda je bila pri meni, dala sem joj sireka. Tak ga je dugo falila i jela, dok se nis digla od kave kaj ne da je več bila mrzla, nek je i poterala mladice ze sosa, i zamotala joj sireka. Same da več jenput ode. Kak velim, mi na selu vsega imame, ni problem nekomu podati sireka, a gda mi veli da ga same ja na celomu svetu znam narediti kak nejna pokojna babica, ja nemrem a da joj ga ne spakeram. Za lepe reči. Dela bedaka z mene i vreme mi krade. Trebam podojiti kravice, naraniti pujceke, dedu obeda dati a ona dojde sireka fektati, i ne zna otiti. Joj je treba nekak pomoči da ode z moje hiže čim prede, na fini način, a kak?
Jožek je predložil diverziju, kak su v partizanima delali, išlo je na iznenađenje. I tak sem ja po Jožekovom planu, zamotala jen suhi sirek, dela ga vu vrečicu z pateke, onu plastičnu kaj bu četiristo let plivala po morju, a mislim si da bi bar v pateki trebali davati zdrave vrečice a ne te kaj budu ribice, rake i zvezdače, vmorile. A ljudi v budučnosti se budu razboleli gda je budu pojeli. Ili baš zato, kak veli sused Tomek, kaj bi prodali puno više aspirinov i lekov i vitaminov gda se budu ljudi ze plastikum otruvali. Terorizem kakvega svet još ni videl, ak se mene pita!
I tak je ta pisana najlon vrečica, visela na klinčanici pri vratima. A Krivušićka nikak dojti, kak da je osetila da se sprema, ta, diverzija. Bome sme čekali tri dni, kad, evo ti nje. I zvoni ona, pes se oče potrgati, gusaka je bilo čuti tak da se čini da je smak sveta! Pozvoni ona drugi, trejti put i ide Jožek k vratima. Ja sem se stisla v gajnku za vratima od sobe, komaj sem disala a srčeko je tuklo kak vnukov metronom na klaviru. Bilo mi je gospe Krivušićke malo žal. Bu ju sram…
Dobar dan, susjed. Je li Ifkica kod kuće?
Bogdaj, suseda, ni Ifkice doma.
A kako to?
E, to je suseda nejni posel, to vam ne bi štel reči.
Ne vjerujem Vam, vidjela bih ju na cesti. Ma gdje bi ona otišla, ona je poput te vaše zidane peći, dio kuće. Vi nešto skrivate. Ja ću pozvati policiju ako mi odmah ne pokažete gospođu Ifkicu! Sinoć je bila strašna buka kod vas, bili ste pijani!
Ifkica je otišla k deci v Zagreb, zet je došel po nju, rano su prešli, bu decu čuvala, sneha ide na službeni put. A to je televizor delal, nekakva domača serija, tam navek galame, znate loša tehnika snimanja, jeftina, ni Vam to Holivud.
Bome je gospa Krivušićka pritisla mega diverzanta. Akcija i protuakcija. A i nazvala me gospođa Ifkica! Štelo mi se smejati, no nis smela, bi me čula. Čim je ona više napadala, to se on više branil. Treba je i Jožeku neko roge pokazati.
Ifkica ne bi otišla k djeci da mi se ne pohvali. Vi to meni lažete. Ja želim vidjeti Ifkicu ili ću vas tužiti za zlostavljanje i ubojstvo.
Vidla sam kak se Jožek češe po glavi, a gda je ruku pustil niz telo, šaka mu je pobelila kak ju je jako stiskal. Na sreču je zvonil telefon i Jožek ju je otpravil i zaklučal vrata. Gledeli sme čez firangu kak se nalukava v hižu, bome je bila na pol metri od nas, nisme se usudili ni oči pomeknuti ni dihati. Bila je to gusta firanga, sreča za nas, bome sme se straha navužili. Komaj je otišla, još je zvadila vrečicu z žepa i nabrala si tak trideset sliv, otrgnula par kruški i prešla. Pes i guske su začkomele. Mislila sem si da ju moram nazvati z mobitela da se osvedoči da je vse v redu, kak je bedasta još bu i policiju zvala. A če je zove, onda ona ni terorist, nečeju oni imeti posla z plavcima (policajcima i milicajcima), to ne.
Kak i sve v živlejnju, i to je prešlo i bilo zaboravleno. Krivušićka je pak bar jenput na teden znala dojti po sireka i na kavu. Ja sem Jožeku zabranila da ju stera i posvadi se, mene su moji pokojni roditelji vučili da se ze vsima treba biti dober.
Tu noč sem senjala kak me je zemla, da me je zemlica kak se vrti, stepla ze se i hitila vu svemir a tam na ti Mlečni stezi, kaj valda mlečec raste z obadve strane, kak jastreb raširenih kril jedrila Krivušićka i smejala se, kaj da je poludela. Bilo je bome gusto. Ja sem imela za razemti da je to bila moja savest. Ti teden je došla k meni čak dva put! Sela si je i ni pomislit da bi doma otišla. Grela se i jela vse kaj sem joj ponudila. Krave su v štali tulile, bile su žeđne, čez oblok sem vidla dve kokoši kak na vrtu čokaju mladu salatu, bome su ju jele da sem mislila da se budu zagutile, kak su im pasali vitamini i vlakna. Zdrava rana skroz na skroz. Jožek je zel traktora i otišel nekaj pojesti a obed na peči se skoro celi pokuhal. Rešila sam narediti velikega greha i ne poslušati kaj su mi moji govorili i drugi put gda se dotepe, sterati ju ze svoje hiže. Za na veke vekova, amen.Kaj je preveč, preveč je.
V petek, vidla sem da sirek tam još visi na klinčenici pri vratima, morti se je i splesnivel, sme ga pozabili. Pod sirekom, na stelaži je bila i flaša z vinom. Pak sem se setila da je Jožek rekel, če naš novi sused Mirek dojde dajngubiti i sedeti, da mu mam na vratima dam to vino kaj ne bi vreme, vino i toplinu naše pečice dobil zabadaf, a mi se čini da je Jožek bil i lubomorni. To je bilo domače vince z drugoga sudića, onoga od dvestopedeset litri, na levo, kak se zajde v klet, čisti delanec kaj sme z tropa i cukora skinuli, a ti gospon Mirek ga se ni mogel nafaliti. Bedak, niš ne zna o vinu. I bome je pozvonil gda je Jožek bil na polu i zaoraval strnišče. Ja sem otprla vrata, same sem mu gurnula v ruke flašu zamotanu v novine i rekla da nemam cajta za dajngubiti i sedeti ž njim, da bu razmel da je Jožek ljubomorni, a sama sem doma. I kaj bi si ljudi misleli!? Ostal je stati onak zbeleni pri vratima, a ja sem zaklučala i pobegla v hižu. Bome mi je srčeko tuklo, za neveruvati!
Mirek je ostavil flašu ze vinom na otiraču i otišel. Nigdar več ni došel na naše dvorišče. A Krivušićka, ona je došla mam za njim, bome je bile prometno ti dan. Gda sem otprla vrata me pitala kaj je to pri vratima z vanjske strane hiže v novine zamotano, i kaj to tam pri vratima visi na klinčenici. Ja sem rekla sirek. Ona je još rekla je da joj se žuri, kaj bi joj sireka z banjka mam zamotala a bome je sfektala i ti kaj ju je tam fajn dugo čekal. Tak je ti put dobila dva sireka i zela je i vino več gda je ponuđeno pri poceku. I ni ju bilo sram. Ma, da bi i reč rekla! 

Đurđa Vukelić Rožić prisutna je na književnoj sceni dvadesetak godina, kao autorica kratkih priča, poezije i haikua. Glavna i odgovorna urednica i prevoditeljica časopisa IRIS za haiku-poeziju i druge japanske kratke pjesničke forme. Ukupno, izdala je 25 djela. Članica je DHK Zagreb, i nekoliko udruga za haiku poeziju izvan Hrvatske. Za svoj rad nagrađena je nizom nagrada u zemlji i inozemstvu. Kontakt: dvrozic@gmail.com

Fotografija: randomix